Recent reviews by Sweet

لعبة رعب نفسي قصيرة تلعب فيها بدور مخترق يحاول التسلل إلى منشأة، وتعتمد على حل الألغاز والتقدم في القصة من خلال سطر الأوامر، أكثر شيء أعجبني فيها هو الأجواء و التصميم الفني، الموسيقى، والأصوات كلها تخدم التجربة وتحس بالتوتر والانغماس.

لكن لازم تعرف أن أغلب وقت اللعبة بيكون في استخدام سطر الأوامر وكتابة الأوامر والتنقل بين الملفات، أما إذا ما يعجبك هذا الأسلوب، فغالبًا بتشوفها مملة و تنتهي تقريبًا أول ما تبدأ تتعود على أسلوبها.

تلعب بخروف تم التضحية فيه، ويرجع للحياة مقابل تأسيس طائفة ونشر أتباعها ..
اللعبة تعتمد على حلقة لعب إدمانية، تدخل الدنجن، تجمع موارد وأتباع، ثم ترجع لقريتك تبني وتطور وتهتم بطائفتك قبل ما تنطلق من جديد عشان تصير أقوى ، إدارة الطائفة كانت أفضل جزء بالنسبة لي، كل تابع له احتياج ومع الوقت تبدأ تشيل همهم إذا طولت داخل الدنجن، والأجمل إن اللعبة تعطيك حرية كاملة، تقدر تكون قائد رحيم أو تستغل أتباعك وتضحي فيهم إذا احتجت..

أما القتال، فكان أضعف جزء في التجربة بالبداية ممتع، لكن مع الوقت يصير مكرر وعدد الأسلحة محدود وبعضها ما استمتعت فيه أبدًا لكن يؤدي الغرض ، التصميم الفني من أجمل ما قدمت اللعبة ..الترجمة العربية كان مستواها ممتاز لولا بعض النصوص تصيرغير مفهومة بس ما أثرت كثير ، استمتعت بالأنشطة الجانبية مثل الصيد، ولعبة النرد، ومهام بسيطة تكسر الروتين

بالنهاية ، اللعبة دمجت نوعين بطريقة ممتعة بالأخص إدارة الطائفة كانت أكثر من كافية حتى أكملها للنهاية وانا مروقة جدا وناوية أجرب الإضافة وقت ما تحصل فرصة ..
⭐4\5 (29 ساعة )

طول الوقت أسمع عنها وقد إيش هي محبوبة فدخلتها وأنا متحمسة، أعجبتني الأجواء والاستكشاف بس بعد كذا خلاص ما قدرنا نكمل أكثر من 15 ساعات ، البداية كانت بطيئة والتقدم ما شدني بالشكل اللي كنت أنتظره ، الواجهة بدائية و الانظمة سيئة حتى بعد ما أعطيناها أكثر من فرصة وحملنا مودات عشان نحسن التجربة، حسينا إن الصعوبة غير متوازنة بشكل يخرب المتعة والاستكشاف، وفي النهاية سحبنا عليها

أكثر مطعم ومحل خياطة ناجح في المدينة... وسر نجاحهم مدفون في القبو
الزوج خياط يستدرج الزبائن، والزوجة تدير المطعم وتجهز الأطباق من اللحم اللي يوصلها، والزبائن مستمتعين بالأكل ولا عندهم أي فكرة عن اللي يصير تحتهم، دخلتها وأنا متوقعة إنها مجرد لعبة إدارة بسيطة، والدموية هي أكثر شيء شدني لها، لكن اللي انصدمت فيه فعلًا كان كمية الاهتمام بالتفاصيل، وقبل ما أكمل، أوضح نقطة؛ الي خلاني أنبسط كانت الاجواء اما اللعبة جيدة .

وأنا ألعب، اكتشفت إني كنت مستمتعة بملاحظة قرارات المطورين أكثر من انشغالي بالإدارة نفسها، كل مرة كنت أتوقع اللعبة بتعطلني أو تضيع علي شغلي، الاقي قرار تصميم بسيط يحافظ على سلاسة اللعب، مثلًا لو كنت مجهزة شغل وبدأ مشهد ما يروح علي شغلي ، أو إذا فيه مشهد بيبدأ في نفس الطابق، ما يخليك تنزل للمستودع قبل ما يبدأ، كلها تفاصيل صغيرة لكنها خلت التجربة مصقولة بشكل ملفت، أنا تلفتني هالأشياء في الألعاب لكن أول مرة أتكلم عنها في مراجعة، لأن وجودها في لعبة من استوديو صغير كان شيء يستحق الإشادة.

بالبداية كنت أحاول أوازن بين محل الخياطة والمطعم، لكن مع الوقت والتطويرات لقيت الرتم المناسب، وصار تجهيز كل شيء قبل افتتاح المطعم جزءًا من المتعة، وحبيت إن كل شيء تقريبًا له حركة أو مشهد، سواء تجهيز الأكل أو التعامل مع الجثث أو حتى المشاهد القصصية ورسومها، اللي ما عجبني كانت الرسائل النصية، حسيت الكلام كثير ومزدحم، ومع نهاية اللعبة بدأ الروتين يبان، وتمنيت أشوف أحداث أكثر تكسر هالإحساس، مثل شخصيات جديدة أو مواقف مفاجئة ..

لعبة الغاز مجانية، احيانا حلوة ، احيانا مملة من التكرار
حسيت مالها نهاية لدرجة لما شاركت شاشتي على اساس نختمها قعدنا نقاوم النوم .. وما خلصت

لعبة ألغاز سردية كل مرحلة تمثل جزء من الرحلة، تطلب منك بناء جسور، تعديل مسارات، تشغيل بعض الآليات حتى تساعد الشخصيات على مواصلة طريقها ومع تقدمك تبدأ المراحل تقدم أفكار جديدة باستمرار، أول ما بدأت اللعبة حسيت عيوني تلمع من جمال الرسومات ، الإضاءة وتفاصيل قطع الليقو متقنة بشكل يخليك تحس كأنك فعلًا تبني بمجسمات حقيقية
⭐3\5

لعبة تعاونية توصل الى 10 لاعبين ، فكرتها جيدة لكن التنفيذ بايخ صح انها وصول مبكر بس مو لدرجة انها تفتقر لـ بعض الإساسيات ..
⭐2/5

من ألعاب الألغاز الرايقة اللي تميزت بفكرة بسيطة تعتمد على ترتيب وتقطيع قطع السوشي بعدد محدود من القصات حتى توصل للشكل المطلوب ،عيبها بالنسبة لي كان عدم التوازن؛ مراحل سهلة ثم صعبة ثم شيء من التكرار، وهذا خلاني أحس بملل بسيط في البداية ، لكن بعدها بدأت تقدم ميكانيكيات وأفكارا جديدة باستمرار، والأجمل أن تصميم المراحل يعلمك كل فكرة تدريجيًا بدون أي شروحات ، فيعطيك شعور لطيف بالإنجاز

لعبة تنظيف و ترتيب ،حركة الأدوات مو احسن شي لكن كانت مناسبة لاني ادور لعبة قصيرة العبها بدون تركيز مع السوالف
⭐2\5

من الألعاب اللي أعطتني إحساس أنها فعلا في مرحلة الوصول المبكر روق لايت بدون ابتكار، محتوى محدود جدًا، ومستويات الصعوبة غير متوازنة فيها تفاوت كبير و مصممة تكون تعاونية بشكل واضح ما تنفع سولو وهي مضيعة للوقت والمال "حاليا" اتمنى بالنسخة الكاملة تكون أفضل
⭐1.5\5